पीक....

 

 

माजले साऱ्या मनरानात

तण अफाट कुविचारांचे..

उगवू देईना अंतरात

पीक सकस सदविचारांचे...।।१।।

 

मशागत मनशेताची

करून घ्यावी लवकरी..

उगवण या  तणांची

घात पिकाचा करी...।।२।।

 

तण मुळासकट उखडूनी

मोकळे करू शिवार..

पीक वाढेल सद्विचारांचे

स्वच्छ रानी भरदार....!।।३।।

 

बंधुत्वाच्या बरसतील

स्नेहमय  शीतल धारा..

पीक वाढेल माणुसकीचे

वाहील प्रेमाचा झरा...।।४।।

 

पाहुनी  शेती सद्विचारांची

मन हरखुनी जाईल..

माया अन ममतेची

मधुर गाणी गाईल...।।५।।

सौ. सुषमा सुतार

मंगळवेढा